அம்மா செய்முறையில் மசாலா உருளைக் கிழங்கு

சனிக்கிழமை மதியம் பள்ளிவிட்டதும்

மூவரும் வந்துவிடுவோம்.

அன்றைய மாலை விளையாட்டுக்குப் போவதற்கு முன்ஸ்பெஷல் டிஃபன் உண்டு. 

ஏதாவது எண்ணெய்ப் பலகாரம் செய்து கொடுப்பார்

அம்மா. 

தேங்குழல்,ஓமப்பொடி, நாடா பக்கோடா

இப்படி கறுக் முறுக் இருக்கும்.

எல்லாமே அப்போது புதிதாக வந்த ஜனதா ஸ்டவ்வில்

தான் செய்வார்.

அதற்கு முன் விறகடுப்பில் செய்திருப்பாரோ

என்னவோ.

கரியடுப்பில் செய்வதனால் நானும் உதவி இருக்கிறேன்.

ஞாயிற்றுக் கிழமைக்கு சின்ன வெங்காய சாம்பாரும் 

வடாம் பொரித்ததும் இருக்கும். சாயந்திரம்

பூரி  உருளைக்கிழங்கு மசாலா இருக்கும்.

திருமங்கலம் உருளைக்கிழங்கு மிக மிக ருசி.

ஏன்  சனிக்கிழமை, ஞாயிற்றுக்கிழமைக்கு 

இவ்வளவு முக்கியத்துவம் என்றால் 

காரணம் அப்பாதான்.

அலுவலகத்துக்குப் போகும் போது

க்ரோஷாவில் பின்னப்பட்ட ஒரு பையில் தெர்மாஸ்

ஃப்ளாஸ்கில் காப்பி மட்டும் எடுத்துச் செல்வார்.

தபால் அலுவலகம்  அதே சாலையில்  தான் இருக்கும்.

மதியம் கிடைக்கும் நேரத்தில்

குறைவான சாப்பாடு சாப்பிட்டு விட்டுப் போனால்

இரவுதான் வருவார்.

ஞாயிறன்றுதான் முழு ஓய்வு, எண்ணெய்க் குளியல்,

தோட்டம் கவனிப்பு, எங்கள் படிப்பு

பற்றி  செக்கிங்க் எல்லாம் நடக்கும்.

அம்மாவுக்கும் சமையலில் உதவி செய்வார்.

அதில் சின்ன வெங்காயம் உரிப்பதும் அடக்கம்:)

அந்த வீட்டு சமயலறையீலேயே  கிணறு இருக்கும்.

அந்த முற்றத்தில் நானும் அம்மாவும் குளிப்போம்.

வெளிப்புறம் இருக்கும் கிணற்றில் அப்பாவும் தம்பிகளும் குளிப்பார்கள்.

சமையலறையில் அம்மி, கல்லுரல் இருக்கும்.

தோசை வார்க்கும் போது அம்மா பக்கத்தில் உட்கார்ந்து கொள்வோம்.

சமையலறை அடுத்த அறை சாப்பிடும் அறை..

அங்கு தான் ஜன்னல்கள் மூடி இருக்கும்.

ஒரு தடவை பின்புறக்கதவில் பேர் சொல்லாதது வந்ததால்.,

இந்த ஏற்பாடு. இதமான அறை.இரண்டு பக்கத்திலிருந்தும் வெளிச்சம் வரும்

கொலுவைப்பதும் அந்த அறையில் தான்.

அதைத் தாண்டி பெரிய கூடம்.

படுப்பது,படிப்பது,விளையாடுவது அங்கே தான்.

ஒரு சாய்வு நாற்காலி, தாத்தா வந்தால் உட்கார,

படிக்கும் மேஜையும் நாற்காலியும்.

சுருட்டி வைக்கப் பட்ட மெத்தைகள்,

பாய்கள், ஜமக்காளம் எல்லாம்  ஒரு மூலையில்.

''பத்து பைசா கொடுத்து ஆடச் சொன்னால் லட்ச ரூபாய் கொடுத்து

ஓயச் சொல்லணும்.'' பாட்டி சொல்வது   எனக்கு மிகப் பொருத்தம்.:)

அம்மா செய்முறையில் மசாலா உருளைக்கிழங்கில் காரம் இருக்காது.

தக்காளி போட மாட்டார்.

ப்ளெயின் சிம்பிள் உ.கிழங்கு.

மிக நன்றாக வேகவைத்த உருளைக் கிழங்கை

தோல் எடுத்த பிறகு

நன்றாக மசித்து விடுவார்.

சின்ன வெங்காயம், பச்சை மிளகாயை ஒன்றிரண்டாக

நறுக்கி வைத்துக் கொண்டு  ,

அடுப்பில் இரும்பு வாணலியில்

நல்லெண்ணெய் விட்டுக் கடுகு போட்டு

வெடித்ததும்

வெங்காயம் ,பச்சை மிளகாய் போட்டு வதங்கியதும்

மஞ்சள் பொடி சேர்ப்பார். உப்பும் அதில் சேரும்.

கொஞ்சம் ஜலம் சேர்த்துக் கொதித்ததும்

உ;கிழங்கும் அதில் சங்கமம் ஆகும்.

அதுவும் ஒன்று சேரக் கொதித்ததும்

வீட்டில் இருக்கும் கருவேப்பிலைச் செடியிலிருந்து

உருவின கருவேப்பிலை இலைகளைத் தாராளமாகத் தூவி

அடுப்பில் இருந்து

இறக்க வேண்டியதுதான்.

நடுவில் ஓடின குடும்ப புராணத்தைத் தடுக்க முடியவில்லை:)

வல்லிசிம்ஹன்