இணையம் படுத்தும் நேரம். April 17.2022

வல்லிசிம்ஹன்இணையம் படுத்தும் நேரம்.

பாட்டு இல்லை.

சாட்டு இல்லை

நெட்ஃப்ளிக்சும் இல்லை. ப்ளாகர் இல்லை.

ஜி  மெயிலும் இல்லை.

கடவுளே நன்றி. 

இதை எழுதி சேமிக்க ஒரு அழகி இருக்கிறாள்.

6.33 காலை ஏப்ரில் 17.

நம் ஊரானால் பக்கத்தில் இருக்கும் எக்ஸேஞ்சை 

அழைத்து என்ன தொந்தரவு என்றால்

ஏதாவது பதில் வரும் .கம்ப்ளைண்ட் கொடுங்கம்மா

வந்து பார்க்கச் சொல்கிறேன்.

கொஞ்ச நேரம் கழித்து மணி வருவார்.

வீட்டை சுத்தி முத்தி பார்ப்பார்.

டெலஃபோன் கம்பி தவிர எல்லாம் அவர் கண்ணில்

படும்.

எலி இருக்குதாம்மா? இல்லையே அப்பா. எல்லா

வேரையும் கெல்லி வச்சிருக்கே மா.

நான் ஒரு நல்ல எலிபோக்கி வச்சிருக்கேன்

வாங்கி வரட்டுமா.?

வேண்டாம்ப்பா. நீ கனெக்ஷன் மட்டும் பாரு.

நீங்க ஒருத்தர்தான் இங்கே கணினி

பயன்படுத்துகிறீர்களா. 

உங்களுக்குக் கொடுத்த நேரம் எல்லாம் தீர்ந்து

போச்சோ?

இதுக்குன்னு கம்ப்ளைண்ட் கொடுக்கணும்னா

மந்தைவெளி தலமை போஸ்ட் ஆஃபீஸ் 

போகணும்மா.

இதெல்லாம்  20 வருடங்களுக்கு  முந்தின செய்தி.

அப்புறம் மொபைல் ஃபோனில் தம்பிகளொடு

பசங்களோடு ,தோழிகளோடு பணம் கொடுத்து

வாங்கிய இணைப்பில் பேசிய நாட்கள் தொடர்ந்தன.

நோகியா உலகை இணைத்த காலம்.

இணையம் இருக்கும் போது ஸ்கைப், யாஹூ மெசஞ்சர்,

எல்லாம் குடும்பங்களை இணைத்தன.

பேரங்களோடு, பேத்திகளோடு பார்த்து பேசி,

இணையம் கிடைக்காத காலங்களில் 

நெட் கஃபே சென்று, ஒரு மணிக்கு 

இத்தனை ரூபாய் என்று பேசி வந்த நேரங்கள்.

இணையம் இல்லாவிட்டால் இருக்கவே இருக்கு 

வீட்டுக் காரும், வீட்டுக்காரரும்.:)

அவர் அவரது வேலை முடிந்த போது 

என் மேல் இரக்கப் பட்டு வாகனத்தில் அழைத்துக் கோவில்கள், ராசியில் சீட்டுக் கட்டுவது, காஞ்சீவரம் சில்க்கில் காட்டன் புடவைகள் வாங்குவது, ஸ்ரீவித்யா ஸ்டோர்சில்

குங்குமம்,அகர்பத்தி,சாம்பிராணி,மஞ்சள் பொடி, லஸ் டெய்லர் 

கடை என்று அழைத்துச் சென்று

மயிலை ரவுண்ட் அப் முடிப்பார்.

அவருக்கும் தோதுப் படவில்லையானால்

இருக்கவே இருக்கு ஸ்ரீராம் டிராவல்ஸ், ஒரு பார்த்தசாரதியோ,

ஒரு கிருஷ்ணசாமியோ, ஒரு செல்வமோ

 நல்ல வண்டியுடன் வந்துவிடுவார்கள்.

வண்டி எடுத்துக் கொண்டு எங்கு செல்ல வேண்டும் 

என்று அவனுக்கும் தெரியும்.

அம்மா ஹிக்கின்பாதம்ஸா ? என்று கேட்பான்.

ஆமாம் என்றதும்

போகிற வழியில் நம்ம வீட்டுப் பாப்பாக்கு துணிமணி

எடுக்க ஃபாப் இந்தியா போகணுமா என்று வேறு

கேட்பான்.

அதுவும் முடிந்த பிறகு,கை நிறைய புத்தகங்கள், துணிமணிப்

பைகள் என்று வண்டியில் ஏறியதும்,

அம்மா? க்ராண்ட் ஸ்னாக்ஸ் போக வேண்டுமா என்பான்.

அச்சோ அது மறந்து போச்சே..

என்றபடி அங்கேயும் போய்,

சிங்கத்துக்குப் பிடித்த பாதாம் அல்வா, தட்டை ,முறுக்கு

என்று வாங்கி வருவேன்.

நமக்கும் ஒரு காஜி கிடைக்கும்.

சின்ன மகனுக்குத் தான் அப்போது 

இந்தப் பண்டங்கள் கிடைக்காது. உடனே ஒரு

தொலைபேசி(எஸ்டி டி) அனுப்பறேண்டா என்றால்

சரிம்மா போஸ்ட் ஆஃபீஸ் வழியாவே அனுப்பு. டிஹெச் எல் எல்லாம்

நிறைய காசு ஆகும் என்பான்.

என் அப்பா வளர்த்த பையன் ஆச்சே. பணத்தின் 

மதிப்பு தெரிந்தவன்:)

 எல்லாம் செய்து முடித்து

வீட்டுக்கு வந்தால், சிங்கம் வேலை  முடித்து

தன்னோட நேஷனல் ஜியோக்ரஃபிக்குப் போய்

விடுவார். அதற்கப்புறமும் ஐயாவை

எதற்கும் அசைக்க முடியாது.

எட்டு மணிக்கு சாப்பாடு, 9 மணிக்குத் தூக்கம்.

நான் மட்டும் இணையம் கிடைத்ததா

என்று பார்த்து இருப்பதை

உறுதி செய்து கொண்டு ஒரு புலம்பல்

பதிவும், இதோ இந்தப் பதிவு மாதிரியே

செய்துவிட்டு சாயி நாதன், லக்ஹ்மி நரசிம்ஹன் 

எல்லோரையும் வணங்கி உறங்கச் சென்று விடுவேன். இதை எழுதி 

முடிக்கையிலும் கடந்த 5 மணி நேரமாக வைஃபை இல்லை.

ஹாட்ஸ்பாட் ஏற்படுத்திக்கிறான் பேரன்.

இதோ இன்னோரு இணையம் இல்லை பதிவும் ரெடி

அனைவரும் தொடர்பில் இருப்போம்.

+++++ Points:)

  ஒரு புத்தகம் படித்து முடித்தேன்.

இந்த வீட்டு வானொலியில் பாடல்கள் கேட்டேன்.

நம்ம ஊர் மாதிரி  நெட் இணைப்பை

நிறுத்தி ரீஸ்டார்ட் செய்து

செய்து பார்த்தேன்.

குளிர்பெட்டியைத் துடைத்து வைத்தேன்:)

மகள் இறங்கி வந்து இந்த சப்டிவிஷன் முழுவதும் 

இண்ட்டர் நெட் இல்லை என்று உறுதி செய்து விட்டுப் போனாள்.

காலை எழுந்ததும் வேர்டில் போடாதது கையைக் கட்டிப்

போட்ட மாதிரி ஆச்சு:)