பழைய நாள் மோர்க்குழம்பு.

வல்லிசிம்ஹன்

மின் நிலாவுக்காக.

அம்மா செய்த மோர்க்குழம்பு திருமங்கலம் 1958 ++++++++++++++++++++++++++++++++++++++எங்கள் வீட்டில் தம்பிக்குப்  பிடித்த மோர்க்குழம்பும், கொத்தவரங்காயும் எனக்கு நோ நோ. எனக்குப் பிடித்த கத்திரிக்காயும், மிளகு குழம்பும் அவனுக்கு ஒத்துக்காது.:) தம்பி வாடா. உனக்குப் பிடித்த உசிலி செய்து தருகிறேன். சின்னவனுக்கு ரசம் மட்டும் பிடிக்கும்.:) ++++++++++++++++++++++++++++++++++++++++++++++++++++++++++++++++++++ மோர்க்குழம்பு எனக்குப் பிடிக்காத காரணம் அதன் புளிப்பு வாசனை. ஒரு நாள் அம்மா என்னையும் பக்கத்தில் வைத்துக் கொண்டு மோர்க்குழம்பு செய்யும் விதத்தைக் காட்டினார். நல்ல கடைந்த மோரில் பெருங்காயம்,கருவேப்பிலை, துளி தேங்காய் எண்ணேய் சேர்த்து தனியாக வைத்தார். தேங்காயை உடைத்து ஒரு மூடியைத் திருகச் சொன்னார். துவரம் பருப்பு இரண்டு தேக்கரண்டி அளவில் நன்றாக அலம்பி ஊறவைக்கக் காண்பித்துக் கொடுத்தார். எனக்கோ இவ்வளவுதானேம்மா. போதும் என்று சொல்லத்தோன்றியது. அதற்கு அடுத்தாற்போல அம்மா வாணலியை அடுப்பில் வைத்ததும் மீண்டும் கவனிக்க ஆரம்பித்தேன். அம்மாவின் அடுப்பு எப்பொழுதுமே நிதானமாக எரியும். அவசரமாக எதையும் கறுக்கி விடமாட்டார். ஒற்றை விறகும் சில சிராய்த் துண்டுகளிலும்  சமாளிக்கும் திறமைசாலி. ஏம்மா இன்னோரு விறகு வையேன் என்றால், நீதானே விறகு மண்டி போய் வரணும். அதுக்காகத்தான் கொஞ்சமா வைக்கிறேன்  என்று புன்னகைப்பார்.!!!!! என்ன லாஜிக்கோ.... எனக்குப் புரியாது. வாணலியில் 6 சிகப்பு மிளகாய், இரண்டு டீஸ்பூன் உளுத்தம்பருப்பு, கொஞ்சம் வெந்தியம்,குடவே துருவு வைத்திருந்த தேங்காய்த்தூளையும் போட்டு கவனமாக வறுத்துக் கொட்டினார். அம்மா தேங்காய்த் தொகையல் போல இருக்குமா என்று ஆவல் மீறக் கேட்டேன். பின்ன என்னன்னு நினைச்சே. அதே தான்.நீ வேணா பாரு என்று எல்லாவற்றையும் அரைக்கிற( ஏற்கனவே அலம்பி வைத்திருந்த) உரலில் சேர்த்தார். ம்ம். குழவியைச் சுத்து என்று சொல்லிவிட்டு, கத்திரிக்காய் திருத்தி வைக்க ஆரம்பித்தார். கையை,விரலைப் பார்த்துக் கொண்டு அரைத்து எடு. வெழுமூண வேண்டாம் என்று அவ்வப்போது புத்திமதிகள் வரும், அரைத்தவுடன் வந்த வாசனை மிகப் பிடித்தது. என்ன தான் போடலாம் என்றதும் சுற்றிப் பார்த்துவிட்டு வெண்டைக்காய் போடலாமா என்றேன். இன்னிக்கு வெள்ளைப் பூசணி எடுத்துக்கலாம். வெண்டைக்காய் தனியே வதக்கணும். சாப்பிட நேரமாகிறது .இன்னிக்கு கார்த்திகை இல்லையா. இன்னும் விளக்கெல்லாம் தேய்ச்சு வைக்கணும் அகல் விளக்கைத் தண்ணீரில் போட்டுத் துடைத்து வைக்கணும். திரிகள் போட்டு,,குங்குமம் சந்தனம் வைத்து, நல்லெண்ணெய் சிதறாமல்.அகல்களில் விடணும். நீயும் தம்பிகளும் அதை செய்யும் போது நான் பொரி உருண்டை,அப்பம்,வடை, திருக்கண்ணமுது எல்லாம் செய்யணும். இப்போ இதைப் பாரு என்று அடுப்பில் வென்னீரில் பூசணித்துண்டுகளைப் போட்டார். துளி உப்பு சேர்த்து,கொஞ்சம் மஞ்சள் பொடியும் போட்டார். து.பருப்பு,அரிசி ,உ.பருப்பு,வெந்தியம் தேங்காய் அரைத்த கலவையை வைத்திருந்த மோரில் சேர்த்தார். பூசணித்தான் வெந்து விட்டதா என்று பார்க்கும் கட்டம். கையில் வைத்து சோதிக்காமல் ஒரு ஸ்பூனால் நசுக்கிப் பார்ப்பதை வேடிக்கை பார்த்தேன். இப்ப என்ன செய்யணும்? என்னைக் கேட்டார், இந்த மோரை அதில சேர்க்கணும்.'' என்று சொல்லி மூக்கைப் பிடித்துக் கொண்டேன். முதல்ல கையெடு. தளிகை செய்யும் போது கொனஷ்டை செய்யாதே. இப்ப பாரு, என்று மோர்க்கலவை பொங்கி வருவதைக் காட்டினார். இவ்வளவுதான் இதற்கு மேல் கொதிக்கக் கூடாது. இதற்கு சீரகம் திருமாறினால் போதும். என்று முடித்தார். பக்கத்திலிருந்த கிண்ணத்தை எடுத்து அதில் மோர்க்குழம்பையும் தானையும் போட்டு என்னிடம் கொடுத்து,,,,,," சாப்பிடு" என்றதும் தயக்கம் தான். உம்மாச்சிக்குக் காண்பிச்சுட்டு சாப்பிடலாம் என்றவளைப் பார்த்து வாய்விட்டு சிரித்து விட்டார். ம்ம்ம் .மோர்க்குழம்பு நன்றாகத் தான் இருந்தது. அனைவருக்கும்திரு நாள் வாழ்த்துகள். -- ReplyReply allForward