ஆறுவது சினம்:)ப.நி.பே.

வல்லிசிம்ஹன்

189ஆவது பதிவு 2007.

இந்தக் கோபத்துக்குக் காரணமாயிருந்தது ரீடா.

ஒரு குட்டிக் குரங்கு.

ரொம்ப அழகான குட்டிதான்.இருந்ததலும் குணம் குரங்குகுணம்தானே.

சிங்கத்தோட தொழிற்சாலை அருகே இருந்த மின் கம்பத்தில் மாட்டி உயிரை இழக்க இருந்ததைக் காப்பாற்றி வீட்டுக்குக் கொண்டு வந்துவிட்டார்.

அதற்கு ரீட்டானு நாமகரணமும் ஆச்சு.

சீதாவுக்கு ரைமிங்கா ரீட்டாவாம்.:)))

இந்த ஐயாவோ எட்டு மணி சைரன் ஊதுவதற்கு முன்னால் ஏழு மணிக்கு

வேலைக்குப் போகிறவர்.

இரவு வரும் வரை யார் அதைப் பார்த்துக்கிறது.

எனக்கும் முதலில் ரொம்பப் பாவமாக இருந்ததால் சரி போனாப் போகட்டும்னு சரி சொன்னேன். சமையலறை

ஜன்னலுக்கு வெளியே கயிற்றில் கட்டி விட்டுப் பக்கத்தில் தண்ணீர்,ரொட்டி எல்லாம் வைத்துவிட்டுப் போயிருந்தார்.

அதுவோ அம்மா ஞாபகத்தில் யாரைப் பார்த்தாலும் பாய ரெடியாக இருந்தது. சகிக்க முடியாத உர் உர் சத்தம் வேற.

மேடையில் ஸ்டவ்விலொ ஹாட்ப்ளேட்டிலோ ஏதாவது சத்தம் கேட்டால் ஜன்னலுக்குத் தாவி என்னைப் பார்த்துப் பல்லைக் காட்டும்.

நான் ஏன் அப்புறம் அங்கே நிப்பேன்.ஒரே தாவு .கூடத்துக்கு வந்துவிடுவேன்.

பள்ளிக்கூடத்தில் லாங் ஜம்ப் செய்தது எத்தனை பயன்பட்டது பாருங்க.

அதுவோ கூடத்துக்கும் சமையலறைக்கும் நடுவில் இருந்த வராந்தாவில் வந்து உட்கார்ந்து கொண்டு ஆட்டம் காட்டும்.

இதனால் நஷ்டங்கள் பின் வருமாறு ,

1, கிழவி துணைக்கு வரமாட்டார்

2,சாப்பிடச் சமையலறைக்குப் போகமுடியாது.

3,இன்னும் சிரமமான விஷயம் வீட்டு வாசலும் ,வெளிமாடிப்படியும்

ரீட்டாவைத் தாண்டிதான்.

4,எல்லாவற்றையும் விட அன்று மாலை அன்பே வா போகலாம்னு ஒரு திட்டம்.

அந்த வயதில் இவை எல்லாம் பெரிய பிரச்சினை.

வீட்டில ரேடியோ கிடையயது.

படிக்க வேணும்னால் சாமர்செட் மாம்,எட்கார் ஆலன் போ,இன்னோரு பெயர் தெரியாத டூ விமென் என்ற ஒரு நாவல். சோஃபியா லொரென் நடித்து வெளிவந்த படத்தோட கதை.

மற்றதெல்லாம் துப்பறியும் சிங்கங்கள் பற்றிய நாவல்கள்

கொஞ்சம் நம்ம அறிவுக்கு எட்டாத விஷயங்கள்.

இந்த நேரத்தில்தான் மேலே வந்த தொழிற்சாலை வேலையாள்

குரங்கைப் பார்த்ததும் அப்படியே படியோரத்தில் நின்று ஐயா வெளியூர் போறாராம்.இன்னிக்கு இரவு வீட்டுக்கு வர மாட்டார் என்றதும்

ஓனு கூப்பாடு போடலாமானு இருந்தது.

அதுவும் தெரியாதே!!.

அப்புறம் எப்படிச் சமாளித்தேன் என்பது வேறு கதை.¨:-)