அக்கம் பக்கம் என்ன செய்தி.

வல்லிசிம்ஹன்

செப்டம்பர் 3.

 ஒரு முக்கிய நாள். முதல் பேரன் எங்கள் வாழ்வில்

வருகை புரிந்த நாள்.

அன்பின் விஷ்ணு  என்றும் ஆனந்தத்துடன்,ஆரோக்கியத்துடன்

வள வாழ்வு பெற இறைவன் கருணை செய்வான்.

மற்ற செய்திகளில்

இங்கே நேற்று வடகிழக்கு மாகாணங்களில் 

அடித்த சூறாவளி.

நம் பக்கம் வந்தால் நம் பயத்தோடு போகும்.

நம் உறவினர்கள் அங்கே இருப்பதால்

நேற்று எல்லோரையும் தொடர்பு கொண்டு கிடைக்காமல்

கவலைப் பட்டுப் பொழுது கழிந்தது.

சாயந்திரம் தான் அவர்களிடம் இருந்து

பாதுகாப்பான இடங்களுக்கு வந்து விட்டோம்

என்ற செய்தி கிடைத்தது. இறைவனுக்கு நன்றி.

++++++++++++++++++++++++++++++++++++++++++++++++++++++++

எப்பொழுதும் சாலைகளில் ஓட்டிச் செல்லும் போது,

சிங்கம் ரூல்ஸ் ராமானுஜம் தான். 

ஒரு சட்டத்தையும் மீற மாட்டார். அவருக்கு இண்டர் நேஷனல் 

லைசென்ஸ் இருந்தாலும்

இந்த ஊர் வேகத்தைப் பார்த்து 

இங்கேயும் லைசென்ஸ் எடுக்க முயற்சித்து

மனம் மாறிவிட்டார். எல்லோரும் ஒரே மாதிரி ஓட்டுவதில்லை

என்ற குறை அவருக்கு.

அதை நிரூபிப்பது போல அடுத்த வீட்டுப் பெண்

ஒரு அரசு வேலையில் இருப்பவர்

கடந்த திங்கள் மாலை சொன்ன விஷயம்.

அவள் அலுவலகத்திலிருந்து திரும்பும் போது சிக்னல்

பச்சை காட்டியதும் 

இந்த ரோடில் ரைட் டர்ன் எடுக்கும் போது

எதிர் பக்கத்திலிருந்து வேகமாக வந்த வண்டி இவள் பக்கத்தில்

வேகமாக மோதி நின்றிருக்கிறது.

என்ன நடந்தது என்று தெரியவில்லை அவளுக்கு.

எமெர்ஜென்சி தடுப்புகள்(pillows) வெளிவந்து காப்பாற்றி இருக்கின்றன.

அடுத்த நிமிடம் ஆம்புலன்ஸ் வந்து பாரா மெடிக்ஸ் அவளைக்

காரில் இருந்து வெளியே கொண்டு வந்து,

அவள் கணவருக்கு சொல்லி,

மருத்துவமனைக்கு அழைத்துச் சென்று விட்டார்கள்.

அங்கு பரிபூரண செக் அப், ஸ்கான் எல்லாம் செய்து

அடுத்த நாள் காலை வீட்டுக்கு அனுப்பினார்கள்.

அவள் பேசும்போது இன்னும் அவள் தெளியவில்லை.

நேற்றுதான் உடல் நடுக்கம் நின்றிருக்கிறது.:(

மோதினானே அந்த டிரைவரை அர்ரெஸ்ட்

செய்துவிட்டார்களா என்று கேட்டேன்.

சிரிக்கிறார்கள்.

அவனுக்கு வார்னிங்க் கொடுத்து லைசென்ஸ்

தடை செய்யப்படும். கைது எல்லாம் செய்ய மாட்டார்கள்.

அவளுக்குத் தான் ஆபத்து இல்லையே

என்று சொன்னார்கள்.

அவள் வண்டி வொர்க்ஷாப்புக்குப் போனது, சரியாகி வர

இரண்டு வாரம் ஆகுமாம்.

ஒரு பக்கமே சேதமாகி இருக்கிறது.

+++++++++++++++++++++++++++++++++++++++++++++++

இப்போது பெண் வண்டியை எடுக்கும் போது நானும் சென்று விடுகிறேன்.

பள்ளியிலிருந்து பேரனைக் கொண்டுவிட,அழைத்து வர:)

அத்தனை குழந்தைகளையும் தினமும் காண்பது 

நல்ல மகிழ்ச்சி தரும் அனுபவம்.

வண்டியை விட்டு இறங்குவதில்லை.

 பள்ளி இறுதி வகுப்பு மாணவர்கள் 

ஓட்டும் வண்டிகள் பிரமிப்பைத்

தருகின்றன. தெளிவாகத்தான் ஓட்டுகிறார்கள்.

இறைவன் அவர்களை மற்ற வேக ஓட்டுனர்களிடம் இருந்து காக்க வேண்டும்.

இன்னும் வேறு செய்திகளுடன் பிறகு 

பார்க்கலாம். அனைவரும் வளமாக வாழ இறைவன் அருள வேண்டும்.