ஸோஹன் ஹல்வா செய்முறை.........

வல்லிசிம்ஹன்

பக்கத்து வீட்டில் இருக்கும் ஷீதல்  , இந்திய கான்பூரில்

இருந்து வந்தவர்.

வயதான மிக மிக வயதான மாமனார் ,மாமியார்.

28 வயது மகள், 20 வயதில் இன்னோரு மகள்,

கடைக்குட்டி செல்ல மகன்.

வியாபாரம் செய்யும் கணவன். 

இவர்கள் அனைவருக்கும் சமையல் செய்து விட்டு

ஒரு பெரிய கடையில் வேலை

பார்க்கவும் கிளம்பி விடுவார்.

அவர்கள் வீட்டில் ஒரு விருந்துக்குப் போயிருந்தோம்.

அப்பொழுதுதான் ,வெகு நாட்கள் முன்பு

ருசி பார்த்திருந்த சோஹன் ஹல்வாத் துண்டங்களைப்

பார்த்தேன்.

நாங்கள் சேலத்தில் இருக்கும் போது

அங்கே இருக்கும் அகர்வால் ஆர்யபவன் ஹோட்டலிலிருந்து

சிங்கம் வாரத்துக்கு ஒரு முறை

ஒரு பெரிய டின் டப்பாவில் வாங்கி வருவார்.

12 எண்ணமாவது இருக்கும்.

அப்போதெல்லாம் எதுவும் சாப்பிடத் தடை இல்லையே.

மூன்றே நாட்களில் காலி செய்து விடுவேன்.

பாவம் சிங்கம், வாங்கி வைத்த கையோடு வேலை வந்து விடும். திரும்பி வரும் வேளையில்

இரண்டு மீதி இருக்கும்.

களைப்பில்

கொஞ்சம் ருசி பார்த்துவிட்டு வைத்துவிடுவார்.

குழந்தைகள் இருவருக்கும் 

இந்த அல்வாத்துண்டை  நறுக்கித் துண்டுகளாகக் கிண்ணத்தில் வைத்துக் 

கொடுப்பேன். நெடு நேரம் சுவைப்பார்கள்.

கிட்டத்தட்ட 50 வருடங்களுக்குப் பிறகு

இந்தத் துண்டங்களைப் பார்த்தேன்.

ஹல்வா என்பது பெயர் மட்டில் தான். இது டாஃஃபி

மாதிரி கடிக்கக் கடினமாக இருக்கும்.

வாயில் போட்டவுடன் கரைந்து விடும்.

ஷீதல் இந்த அல்வா செய்முறையை எளிதாகச் சொன்னாள்.

 முந்திய வாரம்  அவர்கள் வீட்டுக்கு மைசூர் பாக்

கொடுத்து விட்டிருந்தேன்.

இப்போது எனக்கு ஞாபகப் படுத்தினாள்.

கைவிடாமல் Myசூர் பாகு கிண்டி 

தட்டில் கொட்டினதை மாதிரி

இந்தக் கோதுமை மாவால் செய்த அல்வாவைச் செய்ய வேண்டும் என்றாள்.

எனக்குப் பழைய காலத்து செங்கல் மைசூர்பாக்  ஜோக்குகள்

நினைவு வந்து தொலைத்தது:)

தேவையான பொருட்கள்...

1, ஒரு கப் கோதுமை மாவு,

2,ஒரு கப் பால்,

ஒரு கப் நெய்,

ஒரு கப் சர்க்கரை,

100 க்ராம் நறுக்கிய பாதாம், பிஸ்தா,முந்திரி பருப்புகள்,

1 கப்  தண்ணீர்

ஒரு டப்பா குங்குமப்பூ,

கொஞ்சம் ஏலத்தூள்.

+++++++++++++++++++++++++++++++++++++++++++++++++++++

ஷீதல் செய்த முறை.

ஒரு அடி கனத்த பாத்திரத்தில் கோதுமை மாவை சிவக்க வறுக்கணும்.

2, அதை எடுத்துவிட்டு  ஒரு   கப் ஜலத்தில்

ஒரு கப் சர்க்கரயைப் போடவேண்டும்.சேர்ந்து கொதித்து கிட்டத்தட்டக் கம்பிப்பாகு பதம் வந்த பிறகு

அதனுடன் பாலையும் சேர்த்துக் கொதித்து வரும்போது

இறக்கி ஒரு மஸ்லின் துணியில் வடித்துக் கொண்டு

மீண்டும் அடுப்பில் ஏற்றி, குங்குமப்பூவை சிறிது பாலில்

கரைத்து விட்டு,

கோதுமை மாவை மெது மெதுவே தூவிக் கொண்டே கிளற

வேண்டும்.

கோதுமை மாவும் சர்க்கரையும் கெட்டியாகும் போது,பாதாம், பிஸ்தா

முந்திரித் துண்டுகளையும் ஏலத்தூளையும்

சேர்க்க வேண்டும்.

இது சேர்ந்து வரக் கொஞ்சம் நேரம் பிடிக்கும் 

பொறுமை தேவை,

ஒரு திடமானத் திட்டத்துக்கு வந்தவுடன்

நெய்யை மெது மெதுவே சேர்க்க வேண்டும்,

அல்வாக் கெட்டி முறுக ஆரம்பிக்கும். 

விடாமல் கிளறி அது பொங்கும் நிலைக்கு வந்தாலும்

மீண்டும் நெய் விட்டு நல்ல மணம் வந்ததும்,

ஒரு நெய் தடவிய தட்டில் கொட்டி வைத்தால்

பத்தாவது நிமிடம்

 கத்தியால் துண்டு போடலாம். 

நல்ல பழுப்பு நிறத்தில்,பளபளக்கும் நெய்யுடன் சுவையான

அல்வா தயார்.

கோதுமை அல்வா அப்படியே வாயில் வழுக்கிக் கொண்டு போகும்.

இந்த சோன் அல்வாவுக்கு

 பல் வேண்டும் கடிக்க.

ஆனாலும் ருசி ம்ம்ம்ம்ம்ம்ம்ம்ம்ம். சொல்லி முடியாது.

அந்த நெய் வாசனையோடு 

பருப்புகள் நறனறவென்று நொறுங்க

சாப்பிடும் வைபவமே தனி ருசி!!

சாப்பிடும் போது என் அன்புக் கணவரையும் 

வாழ்த்தி சாப்பிடுங்கள். நன்றி.