எங்கேயோ கேட்ட பாடல் மீண்டும்.....

 எங்கள் ப்ளாக்  வலைத்தளத்தில் வெள்ளியிக்கிழமைப் 

பாடல்கள் 

எங்கள் சேலம் நாட்களை நினைவுக்குக் கொண்டு வந்தன.

சேலத்தில் நான்கு ரோட், ஐந்து ரோடு 

என்று சாலைகள் சந்திக்கும் இடங்களுக்குப் பெயர்.

அங்கே இருந்து பிரியும் ஒரு இடத்தில் டிவிஎஸ் கிளையில் 

சிங்கம் பணி புரிந்து வந்தார்.

திருமணமான புதிது.

புதுக்கோட்டையிலிருந்து வந்த உடன் சின்ன 

மாமனார் வீட்டில் இருந்தோம்.

இரண்டு வாரங்களில் பணிமனைக்குப் பக்கத்திலேயே 

புது வீட்டைப் பார்த்துவிட்டார்.

எப்பொழுதும் போல் ஊருக்கு எட்டா தூரம்.

ஏன் என்று இப்போது யோசிக்கிறேன்.

சிங்கம் தனிக்காட்டு ராஜா தானே எப்போதும்.!!!

நாலு சகோதரிகளுடன் வளர்ந்ததில்

தனிமையை விரும்பும் ஆணாக இருந்திருக்கிறார்.

எனக்குத்தான் புரிபடவில்லை.

எனக்கு வீடு நிறைய மனிதர்கள் இருந்தால் தான்

பிடிக்கும்.

அந்த வீட்டின் ஜன்னலோரத்தில் ஒரு சோஃபாவும் போட்டு,

பக்கத்தில் தன் நூலகத்தையும் வைத்து,

இசையில் மனம் லயிக்கும் படி ஒரு வானொலியும் வாங்கிக் கொடுத்து

தான் தன்  வேலைக்களத்தில்

மூழ்கிவிட்டார்.

ஜன்னல் வழியே தெரியும் சாலையையும், அதற்கும் அப்பால் இருக்கும்

மலைத் தொடர்களையும்,

அந்த மலைத் தொடர்களில் அவ்வப்போது 

எரிக்கப் படும் மரங்களின் அக்கினிச் சிவப்பையும் 

பார்ப்பேன்.

குன்றின் மேல் ஒரு தனி மரம் என் பார்வையில் படும்.

அதன் பக்கத்தில் ஒரு சிறு வீடும் இருக்கும்.

என் எண்ணங்களில் அந்த வீட்டில் இருக்கும் 

தலைவியையும் அவள் குழந்தைகளையும் நினைத்துப்

பார்ப்பேன்.

எனக்காவது அடுத்தாற்போல் ஒன்றிரண்டு வீட்டாராவது இருக்கிறார்கள்.

அந்தக் குடும்பத்தலைவிக்கு யார் துணை?

மகிழ்ச்சிக்கோ , இல்லை அவசிய உதவிக்கோ

யாராவது இருப்பார்களா என்றெல்லாம் மனம்

கணித்துக் கொண்டே இருக்கும்.

அந்த யேற்காடு மலைக்கே ஒரு நாள்

அழைத்துப் போனார் சிங்கம்.

ஏரிக்கரையின்  அருகே இருந்த ஒரு

நண்பரின் வீட்டுக்கும் போனோம்.

அந்த வீட்டில் தான் மாடர்ன் தியேட்டர்ஸ்

இயக்குனர் திரு ராம்சுந்தரம் அவர் மனைவி கலை, மகன்,

மகள் எல்லோரையும் சந்தித்தேன்.

இப்போது அவர்கள் வளர்ந்து திருமணம் முடித்து 

அவரவர் குடும்பங்களுடன் சுகமாக இருக்கிறார்கள்.

கலை, தன் கணவரின் நிர்வாகத்தை மேற்பார்வை செய்வதாகக் கேள்விப்பட்டேன்.

இதமான பெண்மணி,

இதெல்லாம் பழங்கதை.

அவர்கள் படத்தின் இசையில் கண்டு

கொண்ட நயம் என்னை வெகுவாக

ஈர்த்தது.

பாடல்களின்  அமைப்பு,இந்தி ,ஆங்கிலத்தைத் தழுவினாலும்

பாடலின் வரிகளை எப்படி இதுபோலக்

கச்சிதமாக அமைக்கிறார்கள் என்று ஆச்சரியமாக

இருக்கும். 

மேலே பதிந்திருக்கும் இந்திப் பாடல் ஏப்ரில் ஃபூல் படத்தில் லதா மங்கேஷ்கர்

பாடியது.

அதே போல இருவல்லவர்கள் படத்தில் ''அங்கே யேன் இந்தப் பார்வை""

பாடலும் எல் ஆர் ஈஸ்வரி குரலில் ஒலிக்கும்.

இதோ இன்னோரு பாடல்.  '

நூறு வருடங்களுக்கு முன்பே'

என்னும் வரிகளுடன் ஆரம்பிக்கும் ஒரு இந்திப்

பாடல். இதன் பிரதி

''மனம் என்னும் மேடை மேலே'' பாடல்.   வல்லவனுக்கு வல்லவன். அசோகனும்  மணிமாலாவும்

பாடும் பாடல். 

ரசனையில் வல்லவர்கள். நாமும் ரசிக்கலாம்.