About Me

My photo

Just one more correspondent.  9/4/1948   பிறந்தநாள்

Monday, February 19, 2007

எங்க மீனாட்சி.




இந்த மீனாட்சி வீட்டுக்கு வந்து 5 வருடம் ஆகிறது.
4 இன்ச் அளவில் அவள்/அவன் வந்த போது எனக்கு கொஞ்சம் சந்தேகம் தான்.
எவ்வளவு நாள் வாழ்வோ என்று.
ஏனெனில் அவ்வப்போது எங்கள் வீட்டுக்கு திடீர் மீனயோகம்
அடிக்கும் நேரம்.
மீன்கள் வரும். இரண்டு மூன்று நாட்கள் இருக்கும்.
பிறகு பக்கத்து வீட்டுப் பூனைக்கு உணவாக ஆகிவிடும். இதே போல் வாள மீன் விலாங்கு மீன் தவிர மத்த மீன் வகையறாக்கள் வருவதும்,
''பெல்லி அப் ''செய்வதும் நாங்கள் வருத்தப் படுவதும் நடந்து வந்தது.
அக்கம்பக்கம் பசங்க எல்லாம் "யாய்!! மீன் வந்திருக்கு " என்று வந்து பார்ப்பதும், 'அச்சச்சோ இதுவும் போயிடுத்தா ' என்று உச்சுக் கொட்டுவதும் வழக்கமாகி விட்ட வேளையிலே....
எங்க எஜமானரோட ஜிம் சினேகிதர் மீன்
வளர்ப்பது பற்றீ ரொம்பவே சொல்லி,
அடையாரிலிருந்து இந்த 'ஐய்யம்மா'வைக் கொண்டுவந்தார்.
ஏதோ ஒரு பழைய தொட்டியில் போடலாம், ஒரு வாரம் போன பிறகு இருந்தால்(?)
கவனிக்கலாம் என்று நான் மெத்தனமாக இருந்தால்
வீட்டுக்கு வந்த இன்னோரு சினெகிதர், 'அட! இது வாஸ்து மீன் சார். போற இடமெல்லாம் செல்வம் கொழிக்கும்.
கெட்டவங்களை உள்ளயே விடாது.'
நெகடிவ் பீப்பிள் வந்தாங்கன்னா கலரெ மாறிடும் சார்,
ஒரே சிகப்பாகி விடும்.
அப்படியே அவங்களை வாசலோடு வெளில தள்ளிடும்'
என்றெல்லாம் சொல்வதை நான் ஆ' என்று கேட்டுக் கொண்டிருந்தேன்.
போன ஜன்ம பாத்தியதை இருந்தால் தான் இதெல்லாம் வீட்டுக்கு வரும்' என்று சொல்லி விட்டுப் போனார்.
நான் புது மரியாதையோடு மீனம்மாவைப் பார்த்தேன்.
விரல் நீளத்துக்கு மீனைப் பார்த்து சந்தேகம் தான்.
உடனே வண்டியை எடுத்துக் கொண்டு ப்ராட்வே போய்
ஒரு மீன்தொட்டி, கொஞ்சம் மணல், முன்ன இல்லாத
காத்து சுத்தம் செய்யும் மெஷின், குட்டி மீன் பொம்மைகள்
ஒரு பச்சை ப்ளாஸ்டிக் செடி
எல்லாம் வாங்கி வந்து ராகு காலமில்லாத நேரத்தில்
குடி வைத்தாச்சு.
விட்ட உடனே நீந்தின வேகத்தைப் பார்க்கணுமே!!
சாப்பாடு வகையறா என்னன்னு விசாரிச்சா
50பைசா மீன் வாங்கிப் போட்டட ஜீரணமாகும் என்றார்
விற்றவர்.
மீன் வாங்கிப் போடணுமா.இதென்ன அசைவ வகையறாவா,
என்று கேட்டதும் எங்க வீட்டு சிங்கம் சொல்லறார்,ஆமாம்மா அது சொல்ல விட்டுப் போச்சு என்றார்.
எத்தனைதான் இப்படி விட்டுப்போச்சோனு
மீன்கள் விக்கிற கடைக்குப் போய்
ப்ளாக் மோலி என்கிற வகை குட்டிகளை வாங்கி வந்தால் மீனாட்சி என்கிற மீனாட்சிசுந்தரம்
கபளீகரம் செய்கிறார்.கும்னு வளர்ந்து
இப்போ மூன்று அடிக்கு வந்துட்டார்.
முன்பு போட்ட பதிவில் தீர்மானமாக மீனாட்சி எண்றுதான் எழுதி இருந்தேன்.
இப்போது எந்த ஜெண்டர் என்றே தெரியவில்லை.
அது பாட்டுக்கு நீயாரோ இங்கு நானாரோ
என்று நிம்மதியாக இருக்கிறது.
ஒரு சின்னக் கடையில் (pet shop) விட்டு விட்டு
வந்திருக்கிறோம்.
மத்சயாவதாரம் என்று நினைத்துக் கொள்ளவேண்டியதுதான்.
இல்லையென்றால் மதுரை மேல் பாசம் அதிகம் என்பதால் மீனாட்சியம்மா தான் வந்துட்டாங்களோ.
பிள்ளைகள் எல்லோரும் அவங்க அவங்க வேலையைப் பார்த்துக் கொண்டு வெளியூர் போவதால் துள்ளி விளையாட வந்த கிழவனோ தெரியாது.
ஆகக்கூடி நம்ம யாருக்காவது
ஏதாவது செய்ய விட்டுப் போனால் இந்த ரூபத்தில் வருவார்கள் என்பது நிச்சயம்:-)